Manifesto (português) | Subiskritor | Manifestação
Nu kre un bida mas justu. Dja sta bon di kes subida di présu li.
Tudu dia présu a ta subi, argen a ta manxe ta koredu ku el di si kasa, salári ka a ta aguenta nen un mes, y munti família ten ki skodje entri pasa fómi ku pasa friu.
Dipos di pandemia, ben géra, sanson, krizi susial y amiása di raseson ikunómiku, tudu d’un bés. Ta parse ma kel krizi li ka ben pa bai gósi.
Nos djentis a ta ser vítima di un sosiedadi ki inda ta atxa normal paga, kenha ki ta trabadja, mariadu. Kantu pandimia kumésa y ki un munti argen fika gasadjadu na ses kasa, gentis di bairu ka para kunpri ku ses diver. Na linpéza, na transporti, na óbra o na supermerkadu, es kontínua ta sakrifika pa tudu argen fika dretu y pa país ka para.
Tudu dia nu a ta odja lukru di grandi inpréza, sima kes grandi pitrolíferu, ta bira kada bes mas tamanhu y salari di kenha ki ta trabadja, kada bes mas pikinóti.
Nos gobérnu sta mas priokupadu ku paga ses dibra públiku, dos bes mas faxi ki kel ki Union Oropeu kre obriga-nu paga, di ki djuda maiória di nos genti rizisti tudu kel krizi li.
Kel stadu di géra li, na Oropa, dja biradu – ku un sanson ségu, ki ka ta para nen ku se masakri y nen ku skalada di ses konbati – na un géra kóntra kenha ki ta trabadja. Ta intxi bolsu di riku y ta míngua puder di kónpra di trabadjador.
Na un munti bairu, otoridadi kontínua ta ataka y ta fitxa kes kumérsi mas pikinoti sima kes loja ki ta sirbi munti kumunidadi. Es ta prende-s ses merkadoria y ku kel-li es a ta amiása sustentabilidadi di kes bairu, na manutenson di ikunomia lokal. E un géra galanti, xeiu di runhésa, kóntra nos pupulason mas póbri y ki ten ki paradu ku el.
Pa muda kel situason li, povu ten ki ten puder di iziji un kaminhu mas justu pa divididu, na iguladadi, kustu di krizi li. E ka justu pa povu ta karega tudu, el so, na kósta, timenti riku ta ba ta fika kada bes mas riku.
Povu ten ki ganha mas puder pa el pode konsigi ten kel bida ki el ta merese. Purisu, nu a ta iziji un pugrama di krizi ki ta difende tudu kenha ki ta trabadja: Présu di inerjia y di tudu kes prudutu alimentar isensial ten ki tabeladu; Juru di inpréstimu di kasa ten ki konjeladu; rénda spekulativu di kasa ten ki tadjadu, kóre ku algen di se kasa debe proibidu; Ten ki fasedu oméntu jeral di salári, pa riba di kel di inflason; Ten ki kiriadu midida pa apoia kumérsi, inpréza pikinoti, postu di trabadju lokal, pa valoriza konómiku y susialmenti kes trabadju mas invizíbilizadu, sima di kes djentis ki maxe ta kati kati trabadja na linpéza.
Na ténpu di krizi, pulítika ten ki pruteji povu.
Gentis di bairu, priokupadu, militanti di txeu kauza y muviméntu sosial kre da pasu firmi pa konstrui un redi y multiplika ason ki ta da povu mas puder y ki ta konsigi inpoi kes pulitika mas justu, ki ta difende nos genti y tudu kenha ki ta trabadja.
E purisu ki, tudu kenha ki ta subiskreve kel maniféstu di BIDA JUSTU li, (Morador di bairu, djentis di moviméntu susial y tudu kes otu sidadon) a ta konvoka un manifestason na Lisboa, na dia 25 di Febreru, y un munti di otus konsentrason lokal, pa diféza di tudu nos bairu y di própi diginidadi di bida di kes ki ta trabadja y ki ta kíria rikéza di nos pais.
Na dia 25 di Febreru, nu ta sta na ruá pa iziji nos gobérnu pa el obi-nu y pa el toma tudu kes midida minímu ki nu ta prupoi pa kel krizi li konbatedu ku djustisa.
Mas djustisa y mas igualdadi pa nu kaba ku kel krizi runhu li.
Vida justa 